Über uns

D Clique vo uns «Stärnefäld Rueche» isch entstande vo Mitgliider vonere andere Birsfälder Wageclieque. Die Mitgliider hän sich nimme kenne mit däre Strategy identifiziere und sin in dr Folg us däre Clique usträtte. Im Joor 2012 sin denne d «Stärnefäld Rueche» gryndet worde. Mir hän allerdings scho vill friener Fasnacht gmacht als Waageclique, nämlig syt em Joor 2000. Di erschte Statute datiere vom Novämber 1999.

Drufabe isch zerscht zämme mit dene Kolleginne und Kollege ä neyi Clique mit em Name «Stärne Räppler» gryndet worde. Will dä Name aber sehr spontan entstande isch, het me dä im druff folgende Joor uf «Stärnefäld Rueche» gänderet. D Mitgliider sin allewiil no di glychige gsi. Au dr Name het bis hyt Bestand.

Mir «Stärnefäld Rueche» sin traditionsbewussti Fasnächtler, wo fyr d’Erhaltig vo däre Kultur ystehn und die au pfläge. Im Momänt simmer nur in Blätzbums während dr Fasnachtszyt aggtiv, aber au do gohts nit ohni Gäld. Um Gäld kenne z generiere, sin Aggtivitäte usserhalb vo dr Fasnacht ä Grundvorussetzig. Dorum betätige mir uns 2-3 mol pro Joor mit em Beizli am Buuremärt oder allewyl am erschte Wuchenändi im Oggtober an dr Chilbi z Blätzbums. Genaui Date sin unter em Link "Termin" z’finde.

Mir hän keini Passivmitglieder, freue uns aber immer auf ene Zuestupf durch s Sponsoring. Ä Sponsor het kai Verpflichtig. En Yzahligsschyn fyr Sponsore kasch wyter unde finde. Bass aber uff, d Poscht aggzeptiert numme Original-Yzahligsschyn. Dorum wird dr noochstehendi au in druggter Form nit aggzeptiert. Originali kasch allewyl bi unserem Beizli am Buuremärt, an dr Fasnacht oder an dr Chilbi bi unserem Kassier, em Roland bezieh. Mir freye is yber jede Bytrag und dangge härzlig.